Somalia yazidi kukabiliwa na changamoto sugu ya ufisadi ambapo zaidi ya asilimia 80 ya fedha za benki kuu hutumika katika matumizi binafsi.

Wataalamu wa Umoja wa Mataifa wamesema licha ya serikali ya Somalia kupata uongozi mpya bado ufisadi nchini humo unaendelea  kuwa  tatizo kubwa.

Wataalamu hao wamesema zaidi ya asilimia 80 ya fedha zinazotolewa katika benki kuu nchini humo zinatumika kwa mambo binafsi huku matumizi ya asilimia 33 ya mapato ya kila mwezi  ikiwa  ni  mapato ya  shughuli za bandari hayajulikani  yanatumika  vipi  na  asilimia 4 pekee ya mapato ya nchi yanayotokana na shughuli za kutoa  hati za usafiri ndio yanayoifikia serikali ya Somalia.

Katika ripoti iliotolewa kwa baraza la Usalama la Umoja wa Mataifa, wataalamu hao wanaoangalia kwa makini vikwazo dhidi ya Somalia wamesema jambo linalozua hali hii ni kuwepo kwa gavana wa sasa wa benki kuu ambapo dola milioni 12 kati ya dola milioni 16.9 ziliowekwa katika benki hiyo na  shirika la PricewaterhouseCoopers hazijulikani  ziliko.