Mwanafunzi wa kidato cha sita katika shule ya sekondari ya Jitegemee jijini Dar es Salaam, Shamsa Jongo, amefariki dunia wakati akifanya mtihani wa kumaliza.
Mwanafunzi huyo alifariki juzi mchana baada ya kudondoka ghafla akiwa katika chumba cha mtihani.
Mwalimu wa shule hiyo ambaye hakupenda jina lake litajwe gazetini kwa kuw si msemaji, alisema kuwa baada ya kuanguka walijaribu kumkimbiza kwenye zahanati ya shule lakini ilibainika kuwa alikwishafariki.
Mwalimu huyo alisema mwanafunzi huyo aliweza kufanya mtihani wa kwanza wa Kiswahili majira ya saa tano asubuhi na baada ya hapo alikwenda kupumzika.
Alisema mwanafunzi huyo alirudi kuanza mtihani wa pili wa General Studies uliokuwa ukianza saa saba mchana na muda mfupi ndipo alianguka.
Mwalimu huyo alisema marehemu alizikwa jana katika makaburi ya Yombo Buza jijini Dar es Salaam.
Alisema mwanafunzi huyo alikuwa akisumbuliwa na ugonjwa wa moyo mara kwa mara na alikuwa akihudhuria kliniki ya matibabu ya moyo.