Dk Kamala akiangalia malighafi itakanayo na maua ya pareto alipozuru kiwanda cha Pareto Mafinga.

 Martin Oweka Meneja wa PCT akimuonesha Dk Kamala shehena ya maua ya pareto ikiendelea kupimwa 
 Akielezwa jinsi ubora wa pareto unavyochunguzwa katika maabara ya kiwanda
Akielezwa mitambo ya kiwanda inavyofanya kazi


.................

BALOZI wa Tanzania nchini Ubelgiji, Dk Diodorus Kamala amekitafutia soko la malighafi inayozalishwa kutokana na maua ya pareto, Kiwanda cha Pareto Tanzania (PCT).
Hatua hiyo ni utekelezaji wa diplomasia ya uchumi inayomtaka kila balozi kutafuta masoko ya bidhaa zinazozalishwa hapa nchini.

Katika ziara yake aliyofanya  katika kiwanda hicho juzi, Balozi huyo alisema “ nilikuja nchini na wafanyabishara na wawekezaji 65, wametembelea sehemu mbalimbali za uwekezaji bara na visiwani.”

Alisema katika utendaji wake kazi za kibalozi nchini Ubelgiji alikutana na kapumi ya Nilo Vital France/Belgium iliyoonesha nia ya kuendeleza sekta ya kilimo cha pareto nchini.

“Kampuni hiyo inataka kufanya biashara na PCT na kwa kuanzia imeahidi kununua tani 40 za malighafi itokanayo na maua ya pareto kila mwaka,” alisema.

Mbali na kununua malighafi hiyo, Dk Kamala alisema kampuni hiyo ipo tayari kushirikiana na kiwanda hicho kuboresha miundombinu ya kiwanda na kutoa misaada ya kitaalamu na kifedha kwa wakulima ili kuongeza uzalishaji.

“Hii ni kampuni kubwa yenye leseni ya kufanya biashara hiyo katika nchi zote za Ulaya; mkiingia nayo mkataba mtaongeza namba ya masoko, ushindani na hatimaye faida zaidi,” alisema.

Akimshukuru balozi huyo kwa kujali maenddeleo ya sekta ya kilimo hicho, Meneja wa PCT, Martin Oweka alisema aliishauri serikali kurekebisha utaratibu wa utoaji leseni ya ununuzi wa zao hilo kutoka kila baada ya mwaka mmoja na kuwa kila baada ya miaka mitano.

Pamoja na kurekebisha utaratibu huo alisema PCT inapendekeza kampuni zote zenye leseni ya biashara ya pareto ziwe na utaratibu wa kuingia mikataba ya biashara na wakulima ili kuwapa uhakika wa soko.

Kwa mujibu wa Meneja Mkuu wa kampuni hiyo, Martin Oweka, Bodi ya Pareto Tanzania ndiyo yenye jukumu kwa niaba ya serikali ya kutoa leseni hizo.

Akizungumzia uzalishaji, alisema umeongezeka kutoka tani 50 mwaka 2007 hadi tani 3,000 mwaka huu.

Alisema kiasi kilichonunuliwa hakikidhi mahitaji ya kiwanda chao kilichopo mjini Mafinga chenye uwezo wa kusaga hadi kufikia malighafi dondoo tani 5,000 za maua ya pareto kwa mwaka.