ARUSHA: Wakulima zaidi ya 160 wanaomiliki mashamba yenye jumla ya ekari 47,000 katika eneo la Loksale, wilayani Monduli mkoani Arusha, wamesisitiza kuwa wanamiliki ardhi hiyo kihalali baada ya kupewa hati rasmi na serikali.

Wakulima hao wamesema kauli za baadhi ya wanasiasa, wakiongozwa na Mbunge wa Jimbo la Monduli, Isack Joseph, zinazowataja kuwa ni wavamizi si za kweli na zinalenga kuipotosha serikali kuhusu umiliki halali wa ardhi hiyo.

Katibu wa wakulima hao, Joseph Ngaluko, alisema viongozi wa juu wa serikali waliwahi kuunda kamati iliyoshirikisha pande zote ili kujua malalamiko ya wakulima hao, na kamati hiyo ilitoa ushauri kwa serikali kuwa wakulima hao wanapaswa kulipwa fidia iwapo serikali inahitaji eneo hilo.

Naye, mjane wa Mbunge wa zamani wa Jimbo la Arumeru Magharibi, marehemu Elisa Mollel, Eliaichi Mollel, alisema mwaka 1988 Halmashauri ya Wilaya ya Monduli ilitangaza uwekezaji wa eneo la mashamba hayo, na wananchi wa Monduli na nje ya Monduli waliomba kwa kufuata taratibu zote, wakakubaliwa kwa barua na kupewa hati za umiliki wa mashamba hayo. Amesisitiza kuwa wao ni wamiliki halali na si wavamizi kama wanasiasa wanavyodai.

“Waziri Mkuu amepotoshwa na Mbunge wa Monduli Isack Joseph maarufu kwa jina la Kadogoo na tunamwomba atupe nafasi na sisi wakulima atusikilize kwa dakika chache tu atajua ukweli wa jambo hili tunajua serikali haipendi kuona watu wake wakinyanyaswa bila sababu za msingi” alisema Mjane.

Naye, Joseph Lukumay ambaye alikuwa diwani wa kata ya Monduli Mjini kwa miaka kumi ambaye ni mhanga wa sakata hilo alisema yeye analijua vizuri sakata hilo na kusema kuwa wakulima wote walifuata taratibu kuomba na kupewa ekari hizo kumiliki kwa kupewa hati na serikali ya kipindi hicho na kusema kuwa mawazo ya awali ya aliyekuwa Mbunge wa jimbo la Monduli Moringe Sokoine na Waziri Mkuu ya kuwa eneo hilo ni kwa ajili ya malisho na mazoezi ya jeshi yalifutwa na ndio maana Halmashauri ilitangaza kutaka wawekezaji kuomba na kuendeleza eneo hilo na sio vinginevyo.

Akizungumzia tuhuma hizo za kumpotosha Waziri Mkuu,Mbunge Kadogoo alisema yeye amesimamia maamuzi ya watangulizi wake marehemu Sokoine na marehemu Edward Lowassa ya kuwa eneo hilo ni kwa ajili ya malisho na mazoezi ya Kijeshi na sio vinginevyo.

Kadogoo alisema hati za kumiliki mashamba ya wakulima hao haaamini kama zilizotolewa kwa kufuata taratibu kwani eneo hilo lilishatengwa kwa minajiri hiyo na kutolewa hati yenye kuonyesha wakulima wanamiliki eneo hilo na kupewa fidia uamuzi huo unapaswa kubadilishwa kwa kuwa haukufuata misingi halali ya maamuzi ya vikao vya nyuma.