Diddy anakabiliwa na kesi za madai na jinai nchini Marekani

Sean "Diddy" Combs amekuwa akivunja sheria za gereza kwa kuwasiliana na mashahidi katika kesi yake itakayo sikilizwa mahakamani juu ya utumwa wa ngono, wamedai waendesha mashtaka.

Nguli huyo wa muziki anashutumiwa kwa kufanya "juhudi nyingi" za "kushawishi mashahidi," kwa kutumia simu za wafungwa wengine, na kutumia mikutano ya kuzungumza kwa simu na watu ambao hawako kwenye orodha yake ya mawasiliano iliyoidhinishwa.

Waendesha mashitaka walisema pia katika jalada la mahakama kuwa, uhakiki wa simu zilizorekodiwa pia uligundua kuwa Combs aliagiza familia yake kuwasiliana na mashahidi watarajiwa katika kesi yake.

Miongoni mwa juhudi hizo, walinukuu ujumbe wa Instagram uliotumwa na mwanamke, anayepinga madai yaliyotolewa na mwimbaji Dawn Richard katika kesi dhidi ya Combs.

Waendesha mashitaka wanadai taarifa ya mwanamke huyo iliandaliwa na Combs wakati wa mawasiliano kwa ujumbe mfupi na simu nyingi kutokea gerezani.

Pia wanadai kulikuwa na mwelekeo wa wazi kwamba Combs alimlipa mwanamke huyo, baada ya kuchapisha ujumbe wake.

Combs, 55, kwa sasa yuko kizuizini huko Manhattan. Amekana mashtaka yote dhidi yake na amekanusha kufanya makosa yoyote.