Muungano wa kijeshi wa NATO umesema uko tayari kukabiliana na tishio lolote kutoka Iran na utachukua hatua zinazofaa kulinda nchi wanachama.

Kauli hiyo imetolewa na afisa wa NATO akijibu ripoti ya gazeti la Financial Times kwamba Iran inaweza kushambulia vituo vya kijeshi vya Marekani barani Ulaya iwapo Rais Donald Trump ataongeza mashambulizi dhidi ya Iran.

Afisa huyo amesema uwezo wa NATO wa kuzuia na kujilinda ni imara na wenye ufanisi, akitaja tukio la mapema mwaka huu ambapo mifumo ya ulinzi wa anga ya NATO ilinasa makombora ya Iran yaliyolenga Uturuki mara nne tofauti.

Financial Times, ikinukuu vyanzo vilivyo karibu na serikali ya Iran, imesema Tehran inazingatia uwezekano wa kushambulia vituo vya kijeshi vya Marekani barani Ulaya iwapo Trump ataongeza mashambulizi, huku Iran ikitafuta njia za kuzidisha mzozo.

Gazeti hilo pia limesema majeshi ya Iran yamekuwa yakitathmini mali na vituo vya Marekani katika baadhi ya nchi za kusini mashariki mwa Ulaya, ikiwemo Bulgaria, ambayo mwezi uliopita iliruhusu ndege za Marekani kutumia kituo chake cha kijeshi kwa ajili ya kujaza mafuta.